Yaponiya xalqaro hamkorlik agentligi — JICA bilan xotin-qizlar uchun yangi imkoniyatlar muhokama qilindi

Muloqot davomida O‘zbekiston va Yaponiya o‘rtasidagi do‘stlik va strategik sheriklik munosabatlari izchil rivojlanib borayotgani ta’kidlandi.

JICA agentligining mamlakatimizda ijtimoiy-iqtisodiy islohotlarni qo‘llab-quvvatlash, barqaror o‘sishni ta’minlash hamda inson kapitalini rivojlantirish borasidagi ko‘p yillik hamkorligi alohida qayd etildi.
Uchrashuvda O‘zbekistonda xotin-qizlarning jamiyat va davlat boshqaruvidagi rolini oshirish, ularning huquq va manfaatlarini ta’minlash, tadbirkorlik tashabbuslarini qo‘llab-quvvatlash hamda gender tenglikni ta’minlash borasida amalga oshirilayotgan islohotlar haqida so‘z yuritildi.

Tomonlar xotin-qizlarning iqtisodiy va ijtimoiy faolligini oshirish, ayniqsa, chekka va qishloq hududlarida ayollar tadbirkorligini rivojlantirish, mikromoliyalashtirish imkoniyatlarini kengaytirish, yangi biznes boshlayotgan xotin-qizlar uchun startap inkubatorlar tashkil etish masalalarini muhokama qildilar.

Shuningdek, xotin-qizlar va qizlar o‘rtasida raqamli savodxonlikni oshirish, ularni IT, dasturlash va muhandislik kabi yuqori daromadli yo‘nalishlarga jalb etish bo‘yicha hamkorlik istiqbollari ko‘rib chiqildi. Bu borada JICA tajribasi asosida maxsus o‘quv dasturlarini amalga oshirish imkoniyatlari yuzasidan fikr almashildi.

Muloqotda ijtimoiy xizmatlar tizimini rivojlantirish, og‘ir ijtimoiy ahvolga tushib qolgan ayollarni reabilitatsiya qilish va ularni kasb-hunarga o‘rgatish yo‘nalishida Yaponiya tajribasidan foydalanish masalalari ham muhokama qilindi.

Uchrashuv yakunida Oila va xotin-qizlar qo‘mitasi hamda JICA o‘rtasidagi amaliy hamkorlikni yanada kengaytirish, mutaxassislar malakasini oshirish, qo‘shma dasturlar va istiqbolli loyihalarni ishlab chiqish yuzasidan fikr almashildi. Tomonlar bildirilgan takliflarni kelgusida aniq tashabbuslar va qo‘shma “yo‘l xaritasi” asosida davom ettirish imkoniyatlarini ko‘rib chiqishga tayyor ekanliklarini bildirdilar.