Soliq qo‘mitasi rahbariyati ishtirokida tadbirkorlar bilan uchrashuv o‘tkazildi
2025-05-22 17:20:00 / Rahbariyatning bayonotlari va nutqlari
Kichik va o‘rta biznesning jadal rivojlanishi uchun qulay shart-sharoitlar yaratish, sohadagi muammolarni aniqlash va bartaraf etish, tadbirkorlar takliflarini o‘rganish maqsadida joylarda uchrashuvlar davom etmoqda.
Soliq qo‘mitasi raisi o‘rinbosari Ulug‘bek Saʼdullayev ishtirokida ana shunday uchrashuv Qo‘shtepa tumanida ham o‘tkazildi.
Ochiq muloqotda kichik va o‘rta biznes vakillarining mamlakatimiz iqtisodiyotini yuksaltirishdagi o‘rni va roli, soliq siyosatidagi yangiliklar, tadbirkorlik faoliyatini qo‘llab-quvvatlashga qaratilgan imtiyozlar haqida batafsil ma’lumotlar berildi.
Muloqot davomida yer va mol-mulk soliqlari, soliq imtiyozlari, hisobotlarni taqdim etish, ortiqcha to‘lovlarni qaytarish kabi masalalar yuzasidan murojaatlar bildirildi.
Ularning aksariyati joyida hal etildi, yechimi vaqt talab qiladigan ayrim murojaatlar mas’ullarga biriktirilib, ijrosi nazoratga olindi.