Ózbekstan Respublikası Ministrler Kabineti - Ózbekstan Respublikası Húkimeti atqarıwshı hákimiyattıń joqarı organı bolıp, ekonomikanıń, social hám ruwxıy tarawlardıń nátiyjeli iskerlik kórsetiwine basshılıq qılıwdı, Ózbekstan Respublikası Konstituciyası hám nızamları, Ózbekstan Respublikası Oliy Majlis palataları qararları, Ózbekstan Respublikası Prezidentiniń pármanları, qararları hám biylikleri atqarılıwın támiyinleydi.

Ministrler Kabineti Ózbekstan Respublikasında atqarıwshı hákimiyattıń birden-bir sistemasına basshılıq etetuǵın kollegial organ bolıp tabıladı.

Ministrler Kabineti Ózbekstan Respublikası Húkimetiniń aǵzaları - Ózbekstan Respublikası Bas ministri (keyingi tekstte Bas ministr dep júritiledi), onıń orınbasarları hám ministrlerden ibarat esaplanadi. Qaraqalpaqstan Respublikası húkimetiniń baslıǵı Ministrler Kabineti quramına óz lawazımı boyınsha kiredi.

Ministrler Kabineti:

• nátiyjeli ekonomikalıq, social, salıq hám byudjet siyasatı ámelge asırılıwı, ilim, mádeniyat, bilimlendiriw, densawlıqtı saqlawdı hámde ekonomikanıń jáne social tarawdıń basqa tarmaqların rawajlandırıwǵa tiyisli baǵdarlamalardıń islep shıǵılıwı hámde orınlanıwı ushın juwapker boladı;
• turaqlı ekonomikalıq ósiwdi, makroekonomikalıq turaqlılıqtı támiyinlew, kámbaǵallıqtı qısqartıw, xalıq ushın múnásip turmıs sharayatların jaratıw, azıq-awqat qáwipsizligin támiyinlew, qolay investitsiyalıq ortalıqtı jaratıw, aymaqlardı kompleks hám turaqlı rawajlandırıw boyınsha ilajlar kóredi;
• xalıqtı, sonday-aq mayıplıǵı bolǵan tulǵalardı sociallıq qorǵaw sistemasınıń nátiyjeli iskerlik kórsetiwin támiyinleydi;
• átirap-ortalıqtı qorǵaw, tábiyǵıy baylıqlardı hám biologiyalıq túrme-túrlikti saqlaw, ıqlım ózgeriwine, epidemiyalarǵa, pandemiyalarǵa qarsı gúresiw hám de olardıń aqıbetlerin jumsartıw tarawlarında birden-bir mámleket siyasatı ámelge asırılıwın támiyinleydi;
• jaslarǵa tiyisli mámleketlik siyasattıń ámelge asırılıwın támiyinleydi, shańaraqtı qollap-quwatlaw, bekkemlew hám qorǵaw, dástúriy shańaraqqa tiyisli qádiriyatlardı saqlaw boyınsha ilajlar kóredi;
• puqaralıq jámiyeti institutların qollap-quwatlaw ilajların ámelge asıradı, sociallıq-ekonomikalıq rawajlandırıw hám de social sheriklik baǵdarlamaların islep shıǵıw hám ámelge asırıwda olardıń qatnasıwın támiyinleydi;
• puqaralardıń ekonomikalıq, social hám taǵı basqa huqıqları hám nızamlı máplerin qorǵaw boyınsha ilajlardı ámelge asıradı;
• Ózbekstan Respublikası Konstituciyası hám nızamları, Ózbekstan Respublikası Oliy Majlis palatalari qararları, Ózbekstan Respublikası Prezidenti pármanları, qararları hám biylikleri orınlanıwın támiyinleydi;
• atqarıwshı húkimet shólkemleri jumısın muwapıqlastıradı hám baǵdarlaydı, olardıń iskerligi ústinen nızamda belgilengen tártipte qadaǵalawdı ámelge asıradı;
• atqarıwshı húkimet shólkemleriniń jumısında ashıqlıq hám ashıq-aydınlıqtı, nızamlılıq hám nátiyjelililikti támiyinlew, olardıń iskerliginde korrupciya jaǵdaylarına qarsı gúresiw, mámleketlik xızmetlerdiń sapasın asırıw həm olardan paydalanıw múmkinshiligin keńeytiw boyınsha ilajlar kóredi;
• Nızamshılıq palatasına mámleket sociallıq-ekonomikalıq turmısnıń eń zárúrli máseleleri turalı hár jılǵı dokladlardı usınadı;
• mámleket basqarıwı strukturasın jetilistiriw haqkında, respublika atqarıwshı húkimet shólkemlerin dúziw, qayta shólkemlestiriw hám de tamamlaw haqqında usınıslar islep shıǵadı;
• strategiyalıq joybarlawdıń zamanagóy formaları mámleket basqarıwı sistemasına engiziliwin támiyinleydi;
• mámleketti ekonomikalıq, sociallıq rawajlanıwdıń eń zárúrli hám de baslı baǵdarları boyınsha jaqın, orta hám uzaq múddetli perspektivaǵa arnalǵan strategiyalar, koncepciyalar, programmalar hám de “jol kartaları”n ámelge asırıw turalı ilajlar kóredi.

 

Ministrler Kabineti Ózbekstan Respublikasınıń Konstituciyasında, bul Konstituciyalıq Nızamda hám basqa nızamlarda názerde tutılǵan basqa kepilliklerdi de ámelge asırıwı múmkin.

Ministrler Kabineti konstituciyalıq normalar sheńberinde hám nızamshılıqqa muwapıq Ózbekstan Respublikasınıń pútkil aymaǵındaǵı barlıq organlar, kárxanalar, mákemeler, shólkemler, lawazımlı tulǵalar hám de puqaralar tárepinen orınlanıwı májburiy bolǵan qararlar hám biylikler shıǵaradı.

Ministrler Kabinetiniń qararları hám biyliklerine Bas ministr tárepinen qol qoyıladı.

Ámeldegi Ministrler Kabineti jańa saylanǵan Ózbekstan Respublikası Oliy Majlisi aldında óz wákilliklerin moynınan aladı, biraq Ministrler Kabinetiniń jańa quramı qáliplestirilgenge shekem Ózbekstan Respublikası Prezidentiniń qararına muwapıq óz jumısın dawam ettirip turadı.

Ministrler Kabineti óz ıskerligin "Ózbekstan Respublikası Ministrler Kabineti haqqında"ǵı Ózbekstan Respublikasınıń Nızamına muwapıq júrgizedi.