Buxoroda Xitoy kompaniyalari bilan amalga oshiriladigan loyihalar muhokama qilindi

China CAMC Engineering Co., Ltd. (CAMCE) — bu yirik davlat korporatsiyasi boʻlib, umumiy mashinasozlik sanoati (SINOMACH) tarkibiga kiradi va xalqaro miqyosda sanoat, energetika va infratuzilma obyektlarini barpo etishga ixtisoslashgan.

Mazkur kompaniya “Yangi Oʻzbekiston bogʻi” hududida yangi markaziy stadion majmuasi qurilishida ishtirok etish istagini bildirgan va bu borada oʻz loyihasini taqdim etgan.

Muloqotda soʻnggi yillarda Oʻzbekiston va Xitoy oʻrtasida strategik hamkorlik izchil rivojlanib, davlat rahbarlarining tashrif va uchrashuvlari natijasida barcha darajada aloqalar mustahkamlanib, yangi bosqichga koʻtarilayotgani taʼkidlandi. Shuningdek, viloyatda ham xitoylik hamkorlar bilan qator yirik investitsiya loyihalari amalga oshirilayotgani qayd etildi.

Uchrashuvda yangi sport majmuasi loyihasini amalga oshirish bilan bogʻliq tashkiliy masalalar muhokama qilindi.

Viloyat rahbari markaziy stadionni eng zamonaviy talablar va jahon standartlariga mos holda barpo etish, uni yirik futbol majmualaridan biriga aylantirish maqsad qilinganini taʼkidlab, loyihani amalga oshirish bilan bogʻliq barcha masalalarni hal etishda doimiy koʻmak berilishini bildirdi. Belgilangan chora-tadbirlarning borishidan oʻz mamnunligini bildirgan xitoyliklar yaqin muddatda loyihaning tamal toshini qoʻyishga tayyor ekanliklarini maʼlum qildilar.

Maʼlum qilinishicha, yangi stadion xalqaro andozalarga mos 30 ming tomoshabin sigʻimiga ega boʻladi. Atrofida avtoturargohlar va xizmat koʻrsatish obektlari barpo etiladi. Shuningdek, loyihada konferensiya zallari, sport sogʻlomlashtirish komplekslari boʻladi, ijtimoiy imkoniyati cheklanganlar uchun imkoniyat yaratiladi.

Shuningdek, uchrashuvda XCMG (Xugong Group) kompaniyasi bilan oʻzaro hamkorlikda amalga oshiriladigan ishlar yuzasidan ham fikr amlashildi. XCMG (Xugong Group)- 1943-yilda asos solingan, qurilish texnikalari va maxsus transport vositalarini ishlab chiqaruvchi dunyodagi eng yirik Xitoy davlat korporatsiyalaridan biri. Avtokranlar va yoʻl qurilish mashinalari (asfalt yotqizish, katok), ekskavatorlar, gʻildirakli yuklagichlar va buldozerlar, maxsus yuk mashinalari va togʻ-kon uskunalari ishlab chiarayotgan kompaniya dunyo miqyosidagi yirik qurilish brendlari qatorida 5-oʻrinda turadi.