Uchrashuvda “Citi” bankining boshqaruvchi direktori Xenaro Pulat, Markaziy Osiyo va Kavkaz bo‘yicha korporativ bank xizmatlari direktori Jeyson Zullo hamda O‘zbekiston Respublikasi Iqtisodiyot va moliya vaziri o‘rinbosari Xurshed Mustafayev va boshqa ma’sul vakillar ishtirok etdi.

Ma’lumot uchun: Citibank — AQShdagi eng yirik banklardan biri bo‘lib, Citigroup Inc. moliyaviy holding kompaniyasiga tegishli. U global miqyosda moliyaviy xizmatlar ko‘rsatishga ixtisoslashgan va ko‘plab mamlakatlarda o‘z filiallariga ega.

Muloqot davomida tomonlar o‘zaro hamkorlik aloqalarini rivojlantirish, hamkorlikda amalga oshirilgan loyihalar va kelgusida hamkorlik yo‘nalishlarini belgilash hamda mamlakatimizdagi iqtisodiy rivojlanish jarayonlari yuzasidan muhokamalar olib bordi.

Xususan, tomonlar quyidagi muhim yo‘nalishlarga alohida to‘xtalib o‘tdi:

Mamlakatimizda amalga oshirilayotgan ijtimoiy-iqtisodiy islohotlarni davom ettirish;

Xususiylashtirish jarayonlarini jadallashtirish;

Davlat ishtirokidagi korxonalarni rivojlantirish va raqobatbardoshlikni oshirish;

Hududlarda davlat-xususiy sheriklik asosida amalga oshirilayotgan loyihalar, jumladan, elektr yetkazib berish sifatini oshirish, aholini suv bilan ta’minlash tizimini takomillashtirish yuzasidan loyihalar;

Xususiy sektorni har tomonlama qo‘llab-quvvatlash;

Xalqaro suveren reytinglar bilan hamkorlik;

Jahon Savdo Tashkilotiga a’zo bo‘lish jarayonlari;

Inflatsiya darajasini tushirish va barqarorligini ta’minlash.

Muzokaralar yakunida tomonlar manfaatli hamkorlik aloqalarini yanada rivojlantirish hamda yuqoridagi yo‘nalishlarda fikrlar almashinuvi jarayonlarini kengaytirishga kelishib oldi.