Бурын бул аймақ экономикасы санаўлы тармақлар менен шекленген еди. Кейинги сегиз жылда ўәлаятқа 8 миллиард доллардан аслам инвестиция тартылып, экономика қурамы кеңейди. Тек ғана санаат тараўында 6 мың жаңа кәрхана ашылды. Санаат өнимлерин ислеп шығарыў көлеми 6 еседен зыят артты.

Туризм инфраструктурасы жақсыланып, жаңа орынлар шөлкемлестирилди. Абырайлы мийманхана брендлери кирип келди. Жыллық туристлердиң саны 1 миллион 700 мыңға жетти.

Өзбекстан Президентиниң 2024-жыл 5-декабрьдеги қарары менен Бухара ўәлаятында санаат ҳәм хызмет көрсетиў тараўын раўажландырыў бойынша қосымша илажлар белгиленген еди. Нәтийжеде усы жылдың 6 айында санаат өнимлерин ислеп шығарыў 7,3 процентке артты. 198 жаңа санаат кәрханасы шөлкемлестирилди. Жалпы аймақлық өнимниң көлеми 6,4 процентке өсти.

Мәмлекетимиз басшысының басламасына муўапық дүзилген “Реформалар штабы” Бухарада да қосымша имканиятларды жүзеге шығармақта. Презентацияда жуўапкерлер мине, усындай жаңа жойбарлар ҳаққында мәлимлеме берди.

Мысалы, түркиялы исбилерменлер Пешку районында графит қазып алыў ҳәм қайта ислеўге қызығыўшылық билдирген. Вьетнам компаниясы заманагөй турақ жай, Ҳиндстан кәрханасы хирургия орайын қурыўды режелестирген. 217 гектар майданда 260 жойбарды әмелге асырып, 10 мыңнан аслам жаңа жумыс орнын жаратыў мөлшерленген.

Улыўма, ўәлаятта 1 миллиард 700 миллион долларлық 21 жаңа жойбар қәлиплестирилген. Олардың нәтийжесинде 32 мың жумыс орны, 180 миллион долларлық экспорт имканиятының ашылыўы нәзерде тутылған.

Президентимиз аймақ экономикасын раўажландырыў ҳәм халықтың бәнтлигин тәмийинлеў бойынша қосымша имканиятларды көрсетип өтти.

Атап айтқанда, Пешку районында халыққа ижараға берилген жерлерде арзан ыссыханалар қурылып, экспортқа қолайлы егинлер жетистириў жолға қойылған. Бул тәжирийбени ғалаба ен жайдырып, ўәлаят бойынша қосымша 5 мың шаңарақта усындай ыссыханалар шөлкемлестириў ўазыйпасы қойылды.

Шофиркон, Ғиждуўан, Пешку ҳәм Бухара районларындағы 10 мың гектарда жүзим, Вабкент, Ғиждуўан,, Жандар, Ромитан ҳәм Когонда 5 мың гектарда ерик, черешня, әнжир сыяқлы экспортқа қолайлы мийўе бағларын жаратыў бойынша тапсырма берилди.

Бухараның әййемги зыярат орынлары белгили. Бирақ туристлерди көп ўақыт алып қалатуғын ири комплекслер жоқ. Сырт елли инвесторларды тартып, саўда ҳәм саяманлы парк ашыў зәрүр екенлиги көрсетип өтилди.

Және бир үлкен бағдар – санаат. Ўәлаятта 2 ири нефть-газ кәрханасы бар, және биреўи қурылмақта, 10 ири қуяш ҳәм самал станцияларының қурылысы жеделлескен. Бул комплекслер әтирапында киши кәрханаларды жайластырып, инвестиция, санаат ҳәм экспорт көлемин арттырыў мүмкин екенлиги айтылды.

Бухара ўәлаяты ҳәм район ҳәкимлери халық ушын дәрамат дәреклерин көбейтип, кәмбағаллық ҳәм жумыссызлықты азайтыў бойынша режелерин билдирди.